सहारा नेपाल साकोस सिजुवा सेवा केन्द्रद्वारा तीज मिलन तथा शुभकामना आदानप्रदान कार्यक्रम सम्पन्न
मोरङको सिजुवा स्थित सहारा नेपाल साकोस सेवा केन्द्रले भव्य तीज मिलन तथा शुभकामना आदानप्रदान कार्यक्रम सम्पन्न गरेको छ।
महिलाहरुको महान् पर्व तीजको अवसरमा शुक्रवार सेवा केन्द्र संयोजक बैजनाथ शर्मा को अध्यक्षता र प्रमुख अतिथि महिला बडा सदस्य श्री अनिशा रनपहेली को उपस्थीतमा आयोजना गरिएको कार्यक्रममा स्थानीय महिला सदस्यहरू, सरोकारवालाहरू र समाजका विभिन्न व्यक्तिहरूको उत्साहजनक उपस्थिति रहेको थियो।
कार्यक्रममा सहारा नेपाल साकोस सिजुवा सेवा केन्द्रले गत आर्थिक वर्षमा सामाजिक उत्तरदायित्व अन्तर्गत १३ लाख ६४ हजार रुपैयाँ (तेर लाख चौसठ्ठी हजार) वितरण गरेको तथ्यांक सार्वजनिक गरिएको थियो। सामाजिक उत्तरदायित्वअन्तर्गत शिक्षा, स्वास्थ्य, पूर्वाधार, राहत तथा समाजोपयोगी काममा उक्त रकम खर्च गरिएको जानकारी पनि कार्यक्रममा दिइएको थियो।
कार्यक्रमलाई अझ आकर्षक बनाउन विभिन्न खेलकुद, मनोरञ्जनात्मक प्रस्तुतिहरू साथै तीजका परम्परागत गीतमा नाचगान गरिएको थियो। सहभागी महिला तथा पुरुषहरूले समूहगत रूपमा गीत गाएर नाचेका कारण वातावरण उल्लासमय बनेको थियो।
सहारा नेपाल साकोसले यस किसिमका सांस्कृतिक तथा सामाजिक गतिविधिले सहकारी र समुदायबीचको सम्बन्ध अझ मजबुत हुने विश्वास व्यक्त गरेको छ।