सुधिर कर्ण
बिराटनगर, असोज २७
देशकै सर्वोच्च अदालतले आज एक ऐतिहासिक सूचना जारी गर्दै आगलागी र तोडफोडका घटनापछि रोकिएका सबै रिट, मुद्दा र निवेदन दर्ता तथा सुनुवाइ कार्य पुनः सुरु हुने घोषणा गरेको छ।
अदालतका प्रवक्ता अर्जुनप्रसाद कोइरालाद्वारा हस्ताक्षरित सूचनामा भनिएको छ “पूर्ण बैठकको निर्णयअनुसार, अदालतमा दर्ता हुने सबै रिट निवेदन, मुद्दा तथा कार्यविधि २०७४ को नियमावली अनुसार आजदेखि सञ्चालनमा आउनेछन्।”
गत असोज २४ गते सर्वोच्च अदालत परिसरमा भएको आगलागी, तोडफोड र लुटपाटका कारण अदालतको कामकाज पूरै बन्द भएको थियो। कानुन व्यवसायीहरूका अनुसार यस घटनाले देशभरका हजारौं नागरिकको न्यायिक पहुँचमा अवरोध ल्याएको थियो।
आजको निर्णयसँगै सर्वोच्चमा रिट दर्ता, मुद्दा पेशी र सुनुवाइ पुनः सुरु हुने भएको छ। सूचनामा भनिएको छ कि आगामी असोज २८ गतेदेखि नयाँ सुनुवाइ तालिका प्रकाशन हुनेछ, जसअनुसार स्थगित मुद्दाहरूलाई प्राथमिकता दिइनेछ।
कानुन व्यवसायी संघका सदस्यहरूले सर्वोच्चको यो कदमलाई “न्यायिक प्रणालीमा जनविश्वास पुनःस्थापित गर्ने ऐतिहासिक पहल” भनेका छन्। एक वरिष्ठ वकिलले भने “न्याय केही समयका लागि रोकिएको थियो, तर यो निर्णयले फेरि हाम्रो न्यायिक संस्था जीवित भएको महसुस गराएको छ।”
यो निर्णय केवल एक प्रशासनिक पुनःसुरुआत होइन ‘न्याय निरन्तर रहनुपर्छ’ भन्ने संवैधानिक सिद्धान्तको पुनः पुष्टि हो। “सर्वोच्च अदालत केवल न्यायको मन्दिर होइन, यो नागरिक भरोसाको प्रतिक हो। आजको निर्णयले त्यो भरोसा फेरि बलियो बनाएको छ।”