११ भदौ, मङ्गलवार
मोरङ्ग । ब्रह्माकुमारी राजयोग उप–सेवा केन्द्र सिजुवाले विश्व बन्धुत्व दिवस तथा राजयोगिनी प्रकाशमणी दादीज्यूको १८ औँ पुण्यतिथिको अवसर पारेर रतुवामाईस्थित आफ्नै भवनमा आईतवार खुल्ला रक्तदान कार्यक्रम सम्पन्न गरेको छ।
नेपाल समाज सेवा प्रभागको संयोजनमा देशभर एकैसाथ सञ्चालन गरिएको रक्तदान अभियान अन्तर्गत ब्रह्मकुमारी राजयोग उपसेवा केन्द्र सिजुवा द्वारा आयोजित कार्यक्रममा स्थानीय समुदाय, विभिन्न संघ–संस्था र व्यवसायिक क्षेत्रका व्यक्तिहरूको उल्लेख्य सहभागिता रहेको थियो।
कार्यक्रम सिजुवा सेवा केन्द्र सञ्चालिका ब्रह्म कुमारी सुशील दिदीको सभापतित्वमा सम्पन्न भएको थियो भने रतुवामाई नगरपालिका प्रमुख नागेश्वर प्रसाद सिंह प्रमुख अतिथि रहेका थिए। कार्यक्रममा विशिष्ट अतिथि इलाका प्रहरी कार्यालय सिजुवाका प्रमुख श्याम रिजाल, रतुवामाई स्वास्थ्य अधिकृत डा. मनोज चौधरी, डा. देवेन्द्र चौधरी, रेडक्रस सोसाइटीका प्रतिनिधि लगायतले रक्तदानको महत्वबारे प्रकाश पार्दै ब्रम्हाकुमारी राजयोग सेवा केन्द्रले समुदायमा पुर्याउँदै आएको योगदानको प्रशंसा गरेका थिए।
शिविर बिहान ८ बजेदेखि दिउँसो ५ बजेसम्म सञ्चालन गरिएको थियो। यस अवधिमा स्थानीय युवादेखि ज्येष्ठ नागरिकसम्मले उत्साहपूर्वक रक्तदान गरेका थिए। आयोजकका अनुसार रक्तदानमा उल्लेख्य संख्यामा सहभागी भई यस सेवा केन्द्रबाट ४५ पिण्ड रक्त संकलन गरेको जानकारी गराए।
रक्तदान शिविरमार्फत संकलित रगतले जीवन बचाउन मद्दत पुग्ने विश्वास आयोजकले व्यक्त गरेका छन्। साथै, भविष्यमा पनि यस प्रकारका सेवा–मुखी सामाजिक कार्यक्रमलाई निरन्तरता दिने प्रतिवद्धता ब्रम्हाकुमारी राजयोग सेवा केन्द्र, सिजुवाले जनाएको छ।