विराटनगर, असोज २७ ।
विराटनगरको जलजला चौकमा भएको मोटरसाइकल दुर्घटनामा दुई जना व्यक्ति गम्भीर घाइते भएका छन्। स्थानीयको सहयोगमा उद्धार गरी दुबै जनालाई कोशी अस्पताल, विराटनगरमा उपचारका लागि पठाइएको प्रहरीले जनाएको छ।
घाइते हुनेमा मोरङको धनपालथान ४ कर्सिया बजारका निवासी ५२ वर्षीय मोजिम अन्सारी र २८ वर्षीय सिन्धु शाह रहेका छन्। प्रारम्भिक विवरण अनुसार, दुबै जना सोही मोटरसाइकलमा सवार रहेका बेला दुर्घटना भएको हो।
दुर्घटनापछि प्राप्त CCTV फुटेजमा मोटरसाइकललाई एक कारले ठक्कर दिएको देखिएको छ। ठक्कर दिएपछि सो कारका चालक फरार भएको प्रहरी स्रोतको भनाइ छ।
हाल दुबै घाइतेको स्वास्थ्य अवस्था गम्भीर तर स्थिर रहेको अस्पतालले जनाएको छ। यस घटनाबारे प्रहरीले थप अनुसन्धान अघि बढाएको छ।