तीव्र गति दुर्घटनाको कारण, अनुसन्धान जारी
विराटनगर : कोशी राजमार्गअन्तर्गत विराटनगर–३ स्थित तिरुपति पेट्रोल पम्प नजिक आइतबार राति भएको मोटरसाइकल दुर्घटनामा परी एक जनाको मृत्यु भएको छ। मृतक विराटनगर–५ निवासी ४२ वर्षीय नवीन खनाल हुन्, जो मुनलाइट फोटो स्टुडियोका सञ्चालक तथा लाइन्स क्लब अफ विराटनगर गुराँसका सदस्य थिए।
प्रहरीका अनुसार दूध फार्मबाट कञ्चनबारीतर्फ जाँदै गरेको को ३४ प २४३४ नम्बरको मोटरसाइकल र सोही दिशातर्फ जाँदै गरेको प्रदेश १–०२–०४४ प ९५७२ नम्बरको अर्को मोटरसाइकल आपसमा ठोक्किँदा दुर्घटना भएको हो।
राति करिब ८:४० बजे भएको उक्त दुर्घटनामा गम्भीर घाइते भएका खनालको नोबेल शिक्षण अस्पतालमा उपचारका क्रममा सोमबार दिउँसो ४ बजे निधन भएको हो।
एक जना भारतीय नागरिक घाइते
दुर्घटनामा अर्को मोटरसाइकलको पछाडि सवार भारत झारखण्डकी २९ वर्षीया सपना दास पनि घाइते भएकी छन्। हाल उनी विराटनगर–६ रामपुरस्थित माइतीमा बस्दै आएकी छन्। उनको नोबेल अस्पतालमै उपचार भइरहेको छ र अवस्था सामान्य रहेको प्रहरीले जनाएको छ।
दुर्घटनाको कारण तीव्र गति
दुर्घटनापछि को ३४ प २४३४ नम्बरको मोटरसाइकल चालक, झारखण्ड भारत निवासी ३४ वर्षीय राकेश रञ्जनलाललाई प्रहरीले नियन्त्रणमा लिएको छ। प्रारम्भिक अनुसन्धानअनुसार तीव्र गति नै दुर्घटनाको मुख्य कारण भएको मोरङ प्रहरी कार्यालयले जनाएको छ।
🕯️ श्रद्धाञ्जली:
सञ्चार तथा फोटोग्राफी क्षेत्रमा सक्रिय नवीन खनालप्रति श्रद्धासुमन अर्पण गर्दै, शोकसन्तप्त परिवारजनप्रति हार्दिक समवेदना व्यक्त गर्दछौं।