काठमाडौं, पुस २१ — नेपाल सरकारको गृह मन्त्रालयले हालका दिनमा सामाजिक सञ्जालमार्फत धार्मिक र साम्प्रदायिक सहिष्णुतामा आघात पुर्याउने, उक्साउने तथा गलत अभिव्यक्ति फैलिने गतिविधि बढ्दै गएकोप्रति चिन्ता व्यक्त गरेको छ। मन्त्रालयले यस्ता कार्यहरूमा कडा निगरानी राखी आवश्यक कानुनी कारबाही गर्ने चेतावनी दिएको छ।
यो चेतावनी त्यस्तो समयमा आएको हो, जब मधेसी क्षेत्र र तराईका केही जिल्लाहरूमा सामाजिक सञ्जालमा आएका भिडियो र अभद्र टिप्पणीका कारण सामाजिक–धार्मिक तनाव उत्पन्न भएको समाचार सार्वजनिक भएको छ। जनकपुरधाम नजिकैको दनुषामा टिकटक भिडियोमार्फत धार्मिक टिप्पणीमा विवाद बढेपछि बिरगंजमा प्रदर्शन, धर्ना र कर्फ्युसम्मको अवस्था सिर्जना भएको तथा केही स्थानमा मस्जिदमा तोडफोड भएको रिपोर्टहरू बाहिर आएका छन्।
मन्त्रालयले नेपाल बहुजातीय, बहुभाषिक, बहुधार्मिक र बहुसांस्कृतिक विशेषताका साथै लोकतान्त्रिक व्यवस्थासहितको देश भएको उल्लेख गर्दै समुदायबीच द्वेष, वैमनस्यता र अशान्ति फैलाउने गतिविधि कतिपनि सह्य नहुने स्पष्ट गरेको छ।
२०८२ पुस २० गते बसेको उच्चस्तरीय सुरक्षा समन्वय बैठक तथा पुस २१ गते प्रदेश र जिल्ला सुरक्षा समितिका प्रमुखहरू सहभागी भएको बैठकले शान्ति–सुरक्षा एवं धार्मिक सहिष्णुता कायम राख्न सबै निकायलाई संवेदनशील, सजग र सतर्क रहने निर्देशन दिएको मन्त्रालयले जनाएको छ।
सरकारको कदम केवल धार्मिक सद्भावमा मात्र सीमित नभई सामाजिक सञ्जालबाट फैलिने गलत, घृणास्पद र उत्तेजक सामग्री नियन्त्रणमा केन्द्रित रहेको मन्त्रालयको भनाइ छ। कानुनविपरीत अभिव्यक्ति र गतिविधिमा संलग्न हुने व्यक्तिमाथि कडाइका साथ कारबाही हुने पनि मन्त्रालयले स्पष्ट पारेको छ।
मन्त्रालयका अनुसार केही जिल्लाहरूमा सामाजिक सञ्जालको दुरुपयोग गर्दै समुदाय र धर्मका नाममा तनाव सिर्जना गर्ने, तोडफोड, आगजनी र लुटपाट गर्ने प्रयास समेत भएका छन्। ती घटनामा संलग्न व्यक्तिहरूविरुद्ध कानुनी प्रक्रिया अघि बढाइएको जानकारी दिइएको छ।
यस्तै, जातीय, धार्मिक र साम्प्रदायिक सद्भावमा आघात पुर्याउने, घृणात्मक अभिव्यक्ति दिने, हिंसा उक्साउने, अपहरण वा जबर्जस्ती गर्ने तथा सार्वजनिक र निजी सम्पत्तिमा क्षति पुर्याउने जस्ता गतिविधिमा संलग्न हुनेहरु विरुद्ध कडा कानुनी कारबाही गरिने चेतावनीसमेत मन्त्रालयले दिएको छ।
अन्त्यमा, मन्त्रालयले अफवाह र भ्रमपूर्ण प्रचारमा नफस्न, समाजमा शान्ति–सुरक्षा कायम राख्न सबै नागरिकको सहयोगको अपेक्षा गरेको छ।