रंगेली, मोरङ्ग | मोरङको रङ्गेली ६ साहु टोल निवासी बब्लु भनेर चिनिने रञ्जित महतो को युएईमा रहस्यमयी रूपमा मृत्यु भएको छ। मृत्युको खबर बुधबार रङ्गेली नगरपालिकाबाट स्थानीयलाई र त्यसपछि बब्लुको परिवारमा पुगेको हो।
बब्लुको आमाका अनुसार, “केही दिन अगाडि छोरासँग कुरा भएको थियो, छोराले केही पैसा घर पठाइदिन्छु भनेका थिए। तर पैसा नपठाउँदै शुक्रबार छोराको फोन आयो। फोनमा छोराले ‘मेरो आशा नगर्नु, आफ्नो ख्याल राख्नु’ भनेपछि फोन काटियो। त्यसपछि छोरासँग सम्पर्क हुन सकेको छैन,” उनले बताइन्।
उनले थपिन्, “फेरि छोरासँग सम्पर्क गर्न खोज्दा सम्पर्क हुन सकेन। त्यसपछि गाउँलेसँग सहयोग मागें। गाउँलेहरूले कुन एजेन्ट वा कुन मेनपावरमार्फत गएको हो, त्यो जानकारी दिनु भने तर मसँग त्यस्तो जानकारी नै नभएकाले खोजी गर्न सकिएन।”
छिमेकी कमलेश शाहका अनुसार, “बब्लु सम्पर्कविहीन भएपछि उनकी आमाले खोजीको लागि हामीसँग आएकी थिइन्। हामीले कुन एजेन्टले पठायो वा कुन मेनपावरबाट गएका हुन् भन्ने जानकारी को कुनै कागज छ भने त्यो लिएर आउनु अनि खोजी गर्न सकिन्छ भनेर पठाएको थिए। तर मेनपावरको विवरण आउन नपाउँदै विश्वासै नलाग्ने गरी बब्लुको मृत्युको खबर आयो।”
परिवारमा अहिले स्तन क्यान्सरबाट पीडित आमा, प्यारालाइसिसबाट ग्रस्त बुबा, श्रीमती र एक अबोध छोरा छन्। घरको आर्थिक जिम्मेवारी बब्लुका काँधमै थियो। उनको मृत्युले परिवार एकदमै संकटमा परेको छ।
बब्लुको पार्थिव शरीर ल्याउनका लागि रङ्गेली नगरपालिका र प्रमुख जिल्ला अधिकारी (सिडिओ) कार्यालयसँग कमलेश शाह र स्थानीयले समन्वय गरिएको छ। औपचारिक कानुनी प्रक्रियाहरू अगाडि बढाइएका छन्।
स्थानीय गाउँले अनुसार सकेसम्म छिटो बब्लुको पार्थिव शरीर घर ल्याउने प्रयास भइरहेको छ। साथै, सिडिओ र पालिकाको सहकार्यमा बब्लुको मृत्युको कारण पत्ता लगाउने र उचित कानुनी उपचारको पहल पनि भइरहेको जनाइएको छ।