देवनारायण शर्मा / २४ कार्तिक
मोरङ, रंगेली — जेन्जी आन्दोलनपछिको सुरक्षा अभियानलाई तीव्रता दिँदै इलाका प्रहरी कार्यालय रंगेलीले लागुऔषध नियन्त्रणमा ठूलो सफलता हात पारेको छ। विशेष सूचनाको आधारमा प्रहरी निरीक्षक नरेन्द्र बोगटीको नेतृत्वमा गएको टोलीले रंगेली-६ मलङ्ग मलङथान जाने बाटोको पुलबाट खैरो हेरोइनसहित तीन जना युवकलाई पक्राउ गरेको हो।
पक्राउ परेकामध्ये लेटाङ–३ का गणेश बर्देवा र देविन नेपालीसँग अन्दाजी ७.३४ ग्राम, र रंगेली – ८ को पारस राजबंशीसँग २.४७ ग्राम खैरो हेरोइन फेला परेको प्रहरीले जनाएको छ।
प्रहरीले दुईवटा मोटरसाइकलमा सवार ती युवकहरूलाई नियन्त्रणमा लिएर आवश्यक कानुनी प्रक्रिया अघि बढाएको छ। बरामद गरिएको लागुऔषधको परिमाण र पक्राउ परेका व्यक्तिहरूको आपसी सम्बन्धबारे थप अनुसन्धान भइरहेको इलाका प्रहरी कार्यालय रंगेलीले जनाएको छ।
प्रहरी निरीक्षक बोगटीका अनुसार पछिल्ला दिनमा रंगेली आसपासका क्षेत्रमा बढ्दै गएको लागुऔषध कारोबार नियन्त्रणका लागि प्रहरीको सघन अभियान जारी रहेको छ। उनले भने, “जनसहभागिता र सूचनाको सहायताले अपराध नियन्त्रणमा सहयोग मिलिरहेको छ।”
प्रहरीले यस घटनालाई हालैको आन्दोलनपछि क्षेत्रको शान्ति–सुरक्षामा देखिएको सुधार र प्रहरीको सक्रियताले ल्याएको महत्त्वपूर्ण उपलब्धिका रूपमा लिएको छ।