विराटनगर । मधेस प्रदेशका नवनियुक्त मुख्यमन्त्री सरोजकुमार यादवले आज पदभार ग्रहण गर्ने कार्यक्रम सार्वजनिक भएसँगै जनकपुरधामको वातावरण तनावग्रस्त बनेको छ।
मुख्यमन्त्री नियुक्तिको विरोधमा उत्रिएका विपक्षी दलका कार्यकर्ताहरूले प्रदेश सरकारका विभिन्न मन्त्रालयमा तोडफोड तथा तालाबन्दी गरेका छन्। उनीहरूले मन्त्रालयका फर्निचर तथा अन्य सामग्री क्षति पुर्याएको जनाइएको छ।
त्यससँगै बजारका विभिन्न स्थानमा टायर बाल्दै विरोध प्रदर्शन भइरहेका छन्। प्रदर्शनकारीहरूले प्रदेश प्रमुख सुमित्रा देवी भण्डारी र नवनियुक्त मुख्यमन्त्री यादवविरुद्ध नाराबाजी गरेका छन्।
आज बिहानै प्रदेश प्रमुख भण्डारीले नेपाल कम्युनिष्ट पार्टी (एमाले) मधेस प्रदेश संसदीय दलका नेता यादवलाई मुख्यमन्त्रीमा नियुक्त गरेकी थिइन्। सो निर्णय सार्वजनिक भएलगत्तै जनकपुरधाममा विरोध प्रदर्शन सुरु भएको हो।
यसबीच, लोकतान्त्रिक समाजवादी पार्टी (लोसपा) मधेस प्रदेश संसदीय दलका नेता जेनुल राइनले मुख्यमन्त्री नियुक्तिमा प्रदेश प्रमुखको भूमिका शंकास्पद रहेको आरोप लगाउँदै सो नियुक्तिको राजनीतिक तथा कानुनी रूपमा प्रतिवाद गर्ने बताएका छन्।
यता, जिल्ला प्रशासन कार्यालय धनुषाले नागरिकहरूलाई संयमित भई विरोधका कार्यक्रम गर्न आग्रह गर्दै सुरक्षा निकाय परिचालन गरेर स्थिति नियन्त्रणमा लिन प्रयासरत रहेको जनाएको छ। प्रशासनले मानवीय तथा भौतिक क्षति हुन नदिन संयम अपनाइरहेको स्पष्ट पारेको छ।