दार्चुला, १० बैशाख
दार्चुला जिल्लाको खलंगास्थित महाकाली नदी किनारमा भारतीय पक्षले नेपाली भूभाग मिचेर तटबन्ध निर्माण कार्य जारी राखेको खुलासा भएको छ। गोरखापत्रमा प्रकाशित समाचार अनुसार, भारतले करिब ४० रोपनी नेपाली भूमि अतिक्रमण गरी एकलौटी ढंगले निर्माण कार्य अघि बढाइरहेको छ।
२०७० सालको विनाशकारी बाढीपछिको धार परिवर्तनका कारण महाकाली नदी पूर्वी किनारतर्फ सरेपछि, नेपालकै नाप नक्सामा रहेको जमिन नदीपारि पुगेको हो। तर, सो भूभाग नेपालको भए तापनि भारतीय पक्षले त्यसलाई कब्जा गर्दै तटबन्ध बनाइरहेको जनाइएको छ।
स्थानीय जनता र दार्चुलाको जिल्ला प्रशासनले उक्त भूमि नेपालको भएको तथ्यप्रमाणसहित दाबी गरिरहँदा पनि भारतीय पक्षले बेवास्ता गर्दै निर्माण कार्यलाई निरन्तरता दिइरहेको छ। प्रशासनको आग्रह र दुईपक्षीय नापजाँचको प्रस्तावलाई समेत उपेक्षा गरिएको स्थानीय स्रोतले जानकारी दिएका छन्।
यता, स्थानीय प्रशासनले संघीय सरकारलाई घटनाबारे जानकारी गराए पनि हालसम्म केन्द्रबाट कुनै ठोस प्रतिक्रिया नआएको भन्दै स्थानीयहरू आक्रोशित बनेका छन्। सीमावर्ती क्षेत्रमा तनाव बढ्दै गएको र अब स्थिति नियन्त्रणबाहिर जान सक्ने अवस्था देखिएको स्थानीय जनताको भनाइ छ।
स्थानीय नागरिक, प्रशासन र जनप्रतिनिधिहरूले सरकारलाई तत्काल केन्द्रीय नापजाँच टोली खटाएर सीमा प्रस्ट पार्न, भारतीय पक्षसँग कूटनीतिक वार्ता गर्न र अतिक्रमण रोक्न आग्रह गरेका छन्। उनीहरूले नेपाली भूमिको रक्षा गर्न सशक्त हस्तक्षेपको माग गरेका छन्।
यस किसिमको सीमा अतिक्रमण रोक्न तदारुकता नदेखाए देशव्यापी विरोध र प्रतिरोधको लहर फैलिने सम्भावना प्रबल बन्दै गएको जनाइएको छ।