विराटनगर, साउन २१ | nvkhabar.com —
कोशी प्रदेश प्रहरी कार्यालय विराटनगरले विद्युत ट्रान्सफर्मर चोरी प्रकरणमा संलग्न १२ जनालाई पक्राउ गरी सार्वजनिक गरेको छ। पक्राउ पर्नेमा ७ जना चोरीमा संलग्न र ५ जना चोरीको सामान खरिद गर्ने व्यक्ति रहेका छन्।
कोशी प्रदेश प्रहरी प्रमुख, प्रहरी नायव महानिरीक्षक (डिआईजी) ईश्वर कार्कीले एक पत्रकार सम्मेलनमार्फत मोरङ, सुनसरी र झापा जिल्लाका विभिन्न स्थानहरूमा भएका ट्रान्सफर्मर चोरी घटनाबारे जानकारी दिँदै घटनामा संलग्न व्यक्तिहरु, खरिदकर्ताहरु र प्रयोग भएका औजारसहितको विवरण सार्वजनिक गर्नुभयो।
प्राप्त सूचनाका आधारमा प्रादेशिक अपराध अनुसन्धान समूह, विराटनगरको नेतृत्वमा विशेष निगरानी, स्टिङ अपरेशन, सीसीटीभी विश्लेषण र संभावित कबाडी तथा भाँडा पसलहरूमा निगरानी गर्दा अभियुक्तहरू पक्राउ परेका हुन्।
पक्राउ परेका अभियुक्तहरू:
चोरीमा संलग्न:
अर्जुन कुमार माझी (४२), मोरङ ग्रामथान-४
इरज धामी (३१), ग्रामथान-५
रञ्जित तामाङ (२७), बेलबारी-३
अर्जुन चौधरी (२६), बेलबारी-४
अनुज विश्वास (३५), सुनसरी दुहबी-३
प्रयाग कुमार खाँ चौधरी (३९), दुहबी-२
आलम मियाँ (३४), भारत घर भई हाल दुहबी-४ बसोबास
सामान खरिद गर्ने:
लक्ष्य प्रधान (५३), विराटनगर-३
कृष्ण गोपाल ताम्राकार (६२), विराटनगर-६
योगेश अग्रवाल (३२), दुहबी-३
कपिल भट्ट (३१), दुहबी-२
सिताराम राई (३९), इटहरी-४
बरामद सामग्री:
प्रहरीले अनुसन्धानको क्रममा चोरी गरिएका ट्रान्सफर्मरमा प्रयोग भएका तामाका तारहरूमध्ये ७६८.५२० किलोग्राम तामा विभिन्न स्थानबाट बरामद गरेको छ। साथै, २२ थान डायल रेन्च, ३ थान सलाई रेन्च, ३ थान पेचकस, पिलास, ह्याक्सो ब्लेड, ग्रेन्डर, मोटरसाइकल ५ थान, पिकअप गाडी १ थान, मोबाइल १२ थानजस्ता सामग्री पनि बरामद गरिएको छ।
प्रहरीका अनुसार, अभियुक्त समूहले मोरङबाट ८ थान, सुनसरीबाट १२ थान र झापाबाट २ थान गरी जम्मा २२ थान ट्रान्सफर्मर चोरी गरेका थिए।
वार्षिक समीक्षा पनि सार्वजनिक
सोही कार्यक्रममा कोशी प्रदेश प्रहरी प्रमुख कार्कीले प्रदेश प्रहरी कार्यालयको एक वर्षको उपलब्धि र प्रगति विवरण पनि सार्वजनिक गर्नुभयो। यसमा अपराध नियन्त्रण, अनुसन्धान, विपद व्यवस्थापन, ट्राफिक व्यवस्थापन र सामुदायिक साझेदारी कार्यक्रमअन्तर्गतका कार्यहरूको समावेश गरिएको छ।
प्रस्तुति: nvkhabar.com
📌 अपडेटको लागि साथ रहनुहोस्।