मोरङ / एन. भी. खबर
मोरङको कठहरी गाउँपालिका – ३ स्थित हुलाकी सडक निर्माणमा भएको लापरवाही र निरन्तर ढिलाइको विरोधमा बिहीवार स्थानीय महिलाहरूले अनौठो शैलीमा प्रदर्शन गरेका छन्।
महिलाहरूले बाँसको प्रयोग गरी बाटो अवरोध गरेसँगै सडकका खाल्डाखुल्टीमा धान रोपेर विरोध जनाएका हुन्। त्यसपछि उनीहरूले त्यही खेतजस्तै देखिएको सडकमा कुर्सी राखेर धारणा दिँदै सरकार र निर्माण पक्षको ध्यानाकर्षण गराएका छन्।
रातुवामाई नगरपालिकाको रतुवा खोलादेखि विराटनगरसम्मको हुलाकी सडक निर्माण सुरु भएको धेरै वर्ष भइसक्दा पनि रामचोकदेखि लोहेन्द्रा खोलासम्मको खण्ड अझै निर्माण नहुँदा जनताले वर्षौंदेखि सास्ती भोगिरहेका छन्।
स्थानीयहरूका अनुसार वर्षभरि हिँड्न रेनकोट अनिवार्य जस्तै बनेको छ भने सुख्खा मौसममा बाटोको धुलोले स्वासप्रश्वासका बिरामी, बालबालिका तथा वृद्धहरू प्रभावित भएका छन्।
“घर बाहिर पाँच मिनेट उभिन सकिन्न, यस्तो हालत छ,” एक स्थानीय महिला बताउँछिन्।
साथै, दैनिक २–५ वटा सवारी दुर्घटना हुनु सामान्यजस्तै भएको उनीहरूको भनाइ छ।
यसअघि पनि पटक–पटक सडक निर्माणको माग गर्दै आन्दोलन र विरोध भइरहे पनि सरोकारवाला निकायले चासो नदिएको स्थानीयको गुनासो छ। तर यो पटक महिलाहरू आफैँ अगाडि सरेर अवरोध गर्नु भनेको पहिलोपटक हो, जसले आम ध्यान खिचेको छ ।