काठमाडौँ, एजेन्सी – दक्षिण एशियाका दुई प्रमुख प्रतिद्वन्द्वी राष्ट्र भारत र पाकिस्तानले युद्धविराम गर्न सहमति जनाएका छन्। अमेरिकी राष्ट्रपति डोनाल्ड ट्रम्पको पहलमा गरिएको कूटनीतिक संवादपछि यो महत्वपूर्ण सहमति भएको हो।
राष्ट्रपति ट्रम्पले शनिबार आफ्नो सामाजिक सञ्जाल प्लेटफर्म ‘ट्रुथ सोशल’ मा लेखेका छन्, “अमेरिकाको मध्यस्थतामा लामो र कठिन संवादपछि भारत र पाकिस्तान युद्धविराममा सहमत भएका छन्। यो घोषणाले समग्र विश्व शान्तिको दिशामा ठुलो कदम चालेको छ।”
अमेरिकी विदेशमन्त्री मार्को रुबियोले दुवै पक्षले विस्तृत विषयहरूमा वार्ता सुरु गर्ने तयारीमा रहेको बताएका छन्। उनका अनुसार वार्ताका एजेन्डामा सीमा सुरक्षादेखि व्यापार, जल स्रोत व्यवस्थापन र मानव अधिकारसम्बन्धी मुद्दाहरू समावेश छन्।
पाकिस्तानका उपप्रधानमन्त्री तथा विदेशमन्त्री इशाक दारले पनि सामाजिक सञ्जालमार्फत युद्धविरामको पुष्टि गरेका छन्। उनले भने, “पाकिस्तान र भारतबीच युद्धविरामको सहमति बनेको छ। पाकिस्तान शान्ति, स्थायित्व र सुरक्षामा विश्वास गर्छ तर राष्ट्रिय हितमा कुनै सम्झौता गर्न तयार छैन।”
यो सहमति जम्मु–कश्मीर सीमाक्षेत्रमा पछिल्ला तनावहरू बढिरहेकै समयमा आएको हो। विगतका दशकहरूमा बारम्बार युद्धको स्थितिसम्म पुगेका यी दुई मुलुकबीचको यो सहमति दक्षिण एशियाको स्थायित्वका लागि आशाको संकेतका रूपमा हेरिएको छ।